എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി (ESG): ശരീരഭാരം കുറയ്ക്കാൻ ആഗ്രഹിക്കുന്ന ഭൂരിഭാഗം ആളുകളും കഠിനമായ ശസ്ത്രക്രിയകളെ ഭയപ്പെടുന്നവരാണ്. എന്നാൽ വയറ് കീറാതെ, ഒരൊറ്റ സ്റ്റിച്ച് പോലും പുറമെ കാണാതെ അമിതവണ്ണം കുറയ്ക്കാൻ സഹായിക്കുന്ന അത്യാധുനിക ചികിത്സാരീതിയാണ് എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി (Endoscopic Sleeve Gastroplasty) അഥവാ ESG. പരമ്പരാഗത വെയ്റ്റ് ലോസ് സർജറികളോട് വിടപറഞ്ഞ്, കുറഞ്ഞ സമയത്തിനുള്ളിൽ സാധാരണ ജീവിതത്തിലേക്ക് മടങ്ങാൻ ഈ ചികിത്സ സഹായിക്കുന്നു.
എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി എന്നത് ശരീരത്തിൽ യാതൊരുവിധ മുറിവുകളോ ശസ്ത്രക്രിയകളോ ഇല്ലാതെ ശരീരഭാരം കുറയ്ക്കാൻ സഹായിക്കുന്ന ഒരു പ്രക്രിയയാണ്. വായിലൂടെ കടത്തിവിടുന്ന ഫ്ലെക്സിബിൾ എൻഡോസ്കോപ്പ് ഉപയോഗിച്ച് വയറിന്റെ ഉൾക്കൊള്ളാനുള്ള ശേഷി 70 മുതൽ 80 ശതമാനം വരെ കുറയ്ക്കുകയാണ് ഇതിൽ ചെയ്യുന്നത്. എന്താണ് എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി, ആർക്കൊക്കെ ഈ ചികിത്സ അനുയോജ്യമാണ് തുടങ്ങിയ കാര്യങ്ങളെക്കുറിച്ച് കോഴിക്കോട് ബേബി മെമ്മോറിയൽ ആശുപത്രിയിലെ മെഡിക്കല് ഗാസ്ട്രോ എന്റ്രോളജി ആന്ഡി ജിഐ എന്ഡോസ്കോപി കണ്സള്ട്ടന്റ് ഡോ. സമീര് സക്കീര് ഹുസൈന് വിശദീകരിക്കുന്നു
എന്താണ് എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി (ESG)?
എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി (ESG) എന്നത് ശരീരത്തിൽ യാതൊരുവിധ മുറിവുകളോ ശസ്ത്രക്രിയകളോ ഇല്ലാതെ ശരീരഭാരം കുറയ്ക്കാൻ സഹായിക്കുന്ന ഒരു അത്യാധുനിക ചികിത്സാരീതിയാണ്. ഈ പ്രക്രിയയിലൂടെ വയറിന്റെ ഉൾക്കൊള്ളാനുള്ള ശേഷി 70 മുതൽ 80 ശതമാനം വരെ കുറയ്ക്കുന്നു.വായിലൂടെ കടത്തിവിടുന്ന ഫ്ലെക്സിബിൾ എൻഡോസ്കോപ്പ് (ഒരു ചെറിയ ക്യാമറ ഘടിപ്പിച്ച കുഴൽ) ഉപയോഗിച്ചാണ് ഈ പ്രൊസീജിയർ ചെയ്യുന്നത്. വയറിന്റെ ഉൾഭാഗം തുന്നിക്കൂട്ടി അതിനെ ഒരു ചെറിയ ട്യൂബ് ആകൃതിയിലാക്കി മാറ്റുന്നു.
Read Also: വെറും വയറ്റിൽ കാപ്പി കുടിക്കാറുണ്ടോ? ഒഴിവാക്കേണ്ട ശീലങ്ങൾ
പ്രവർത്തനരീതി: വയറിന്റെ വലിപ്പം കുറയുന്നതോടെ ചെറിയ അളവിൽ ആഹാരം കഴിക്കുമ്പോൾ തന്നെ വയർ നിറഞ്ഞതായി തോന്നും. ഇത് ദഹനപ്രക്രിയയെ പതുക്കെയാക്കുകയും അമിതമായി ആഹാരം കഴിക്കുന്ന ശീലം തടയുകയും ചെയ്യുന്നു.ലളിതമായി പറഞ്ഞാൽ സർജറിയിലൂടെ വയറിന്റെ വലിപ്പം കുറയ്ക്കുന്ന അതേ ഫലം, ശരീരത്തിൽ ഒരിടത്തും കത്തി വെയ്ക്കാതെ, വായിലൂടെ ചെയ്യുന്ന എൻഡോസ്കോപ്പി വഴി ESG നൽകുന്നു. മറ്റു ബുദ്ധിമുട്ടുകളൊന്നുമില്ലെങ്കിൽ ചികിത്സ കഴിഞ്ഞ അന്നുതന്നെ വീട്ടിലേക്ക് മടങ്ങുകയും ചെയ്യാം.
ESG ചികിത്സ ചെയ്യുന്നത് എങ്ങനെയാണ്?
ഏകദേശം 60 മുതൽ 90 മിനിറ്റ് വരെയാണ് ഈ പ്രൊസീജിയറിന് ആവശ്യമായി വരുന്നത്. രോഗിയെ പൂർണ്ണമായോ അല്ലെങ്കിൽ അർദ്ധബോധാവസ്ഥയിലോ (Deep Sedation or General Anaesthesia) ആക്കിയ ശേഷമാണ് ഇത് ചെയ്യുന്നത്.
ഇതിന്റെ പ്രധാന ഘട്ടങ്ങൾ താഴെ പറയുന്നവയാണ്:
പ്രാഥമിക പരിശോധനകൾ : ചികിത്സയ്ക്ക് തലേദിവസം രാത്രി മുതൽ ഉപവാസം എടുക്കണം. രക്തപരിശോധന, അപ്പർ ജിഐ എൻഡോസ്കോപ്പി (Upper GI Endoscopy) എന്നിവ മുൻകൂട്ടി ചെയ്യും.
സെഡേഷൻ (Sedation): രോഗിക്ക് വേദനയോ അസ്വസ്ഥതയോ അറിയാതിരിക്കാൻ അനസ്തേഷ്യ നൽകുന്നു. ശരീരത്തിൽ ഒരിടത്തും മുറിവുകൾ ഉണ്ടാക്കുന്നില്ല.
എൻഡോസ്കോപ്പ് പ്രവേശിപ്പിക്കൽ: പ്രത്യേക തയ്യൽ ഉപകരണം (OverStitch system) ഘടിപ്പിച്ച എൻഡോസ്കോപ്പ് വായിലൂടെ വയറ്റിലേക്ക് കടത്തിവിടുന്നു.
സ്യൂച്ചറിംഗ് (Suture Placement): വയറിന്റെ ഉൾവശത്തെ ഭിത്തികൾ (Greater Curvature) യു-ആകൃതിയിലോ (U-shaped) ത്രികോണാകൃതിയിലോ പ്രത്യേക പാറ്റേണിൽ തുന്നി ദൃഢമാക്കുന്നു.
ആകൃതി മാറ്റൽ: തുന്നലുകൾ മുറുക്കുന്നതോടെ വലിയ ആകൃതിയിലുള്ള വയർ ചുരുങ്ങി ഒരു ചെറിയ സ്ലീവ് (Tubular Sleeve) പോലെയായി മാറുന്നു.
റിക്കവറി: പ്രൊസീജിയറിന് ശേഷം രോഗിയെ നിരീക്ഷണ റൂമിലേക്ക് മാറ്റുന്നു. ഏതാനും മണിക്കൂറുകൾക്ക് ശേഷം അന്നുതന്നെ ഡിസ്ചാർജ് ചെയ്യാവുന്നതാണ്.
ഓർമ്മിക്കേണ്ട കാര്യം, ഈ പ്രൊസീജിയറിൽ വയറിന്റെ ഒരു ഭാഗവും മുറിച്ചു മാറ്റുകയോ സ്റ്റേപ്പിൾ ചെയ്യുകയോ ചെയ്യുന്നില്ല. വയറിന്റെ വലിപ്പം യഥാർത്ഥ അളവിന്റെ 20-25% ആയി കുറയ്ക്കുക മാത്രമാണ് ചെയ്യുന്നത്.
ആർക്കൊക്കെയാണ് ESG ചികിത്സ അനുയോജ്യം?
ഡയറ്റും വ്യായാമവും വഴി ശരീരഭാരം കുറയ്ക്കാൻ സാധിക്കാത്ത അമിതവണ്ണമുള്ള (Obesity) വ്യക്തികൾക്കാണ് ESG ഏറ്റവും ഫലപ്രദം. താഴെ പറയുന്നവർക്ക് ഈ ചികിത്സ തിരഞ്ഞെടുക്കാം:
ബിഎംഐ (BMI) 30-ന് മുകളിലുള്ളവർ: പ്രത്യേകിച്ച് ബിഎംഐ 30 നും 40 നും ഇടയിലുള്ള, എന്നാൽ സർജറി ചെയ്യാൻ താല്പര്യമില്ലാത്തവർ.
മറ്റ് ആരോഗ്യപ്രശ്നങ്ങൾ ഉള്ളവർ: അമിതവണ്ണം കാരണം ടൈപ്പ്-2 പ്രമേഹം, അമിത രക്തസമ്മർദ്ദം, ഫാറ്റി ലിവർ (MASLD/NAFLD), സ്ലീപ്പ് അപ്നിയ (Sleep Apnoea), കൊളസ്ട്രോൾ എന്നിവ അനുഭവിക്കുന്നവർ.
സർജറി ചെയ്യാൻ സാധിക്കാത്തവർ: മുൻപ് വയറ്റിൽ ശസ്ത്രക്രിയകൾ ചെയ്തതുകൊണ്ടോ അനസ്തേഷ്യ റിസ്ക് ഉള്ളതുകൊണ്ടോ സാധാരണ ബരിയാട്രിക് സർജറി ചെയ്യാൻ പറ്റാത്തവർ.
ബ്രിഡ്ജ് പ്രൊസീജിയർ (Bridge Procedure): വലിയ ശസ്ത്രക്രിയകൾക്ക് മുൻപായി ശരീരഭാരം കുറയ്ക്കാനും ഓപ്പറേഷൻ റിസ്ക് ലഘൂകരിക്കാനും ഇത് ഉപയോഗിക്കാം.
ഭാരം വീണ്ടും കൂടിയവർ: മുൻപ് ബരിയാട്രിക് സർജറി ചെയ്തിട്ടും വീണ്ടും വണ്ണം വെച്ചവർ.
ESG ആർക്കൊക്കെ പാടില്ല?
വലിയ ഹയാറ്റസ് ഹെർണിയ (Hiatus Hernia), കഠിനമായ ഗ്യാസ്ട്രോ ഈസോഫാഗൽ റീഫ്ലക്സ് (GERD), രക്തം കട്ടപിടിക്കുന്നതിലെ തകരാറുകൾ എന്നിവയുള്ളവർക്ക് ഈ ചികിത്സ അനുയോജ്യമല്ല.
ESG-യും സ്ലീവ് ഗ്യാസ്ട്രക്ടമിയും (Sleeve Gastrectomy) തമ്മിലുള്ള വ്യത്യാസങ്ങൾ
ലോകമെമ്പാടും വണ്ണം കുറയ്ക്കാൻ ചെയ്യുന്ന പ്രധാന ശസ്ത്രക്രിയയാണ് സ്ലീവ് ഗ്യാസ്ട്രക്ടമി (SG). എന്നാൽ അതിൽ നിന്നും തികച്ചും വ്യത്യസ്തവും സുരക്ഷിതവുമാണ് ഇഎസ്ജി.
| പ്രത്യേകതകൾ |
എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി (ESG) |
സ്ലീവ് ഗ്യാസ്ട്രക്ടമി (Sleeve Gastrectomy) |
| മുറിവുകൾ (Incisions) |
ഒന്നുപോലുമില്ല |
3 മുതൽ 5 വരെ ചെറിയ ദ്വാരങ്ങൾ (Laparoscopic) |
| വയർ മുറിച്ചു മാറ്റുമോ? |
ഇല്ല (തുന്നുക മാത്രം ചെയ്യുന്നു) |
ഉണ്ട് (ഏകദേശം 80% ഭാഗം മുറിച്ചു മാറ്റുന്നു) |
| പഴയപടിയാക്കാൻ പറ്റുമോ? |
അതെ, തുന്നലുകൾ അഴിച്ചാൽ സാധിക്കും |
ഇല്ല |
| അനസ്തേഷ്യ (Anaesthesia) |
ഡീപ് സെഡേഷൻ അല്ലെങ്കിൽ ജനറൽ അനസ്തേഷ്യ |
ജനറൽ അനസ്തേഷ്യ മാത്രം |
| ആശുപത്രി വാസം |
അന്നുതന്നെ അല്ലെങ്കിൽ 1 ദിവസം |
2 മുതൽ 3 ദിവസം വരെ |
| ജോലിയിൽ പ്രവേശിക്കാം |
3 മുതൽ 7 ദിവസത്തിനുള്ളിൽ |
2 മുതൽ 4 ആഴ്ച വരെ എടുക്കും |
| സങ്കീർണ്ണതകൾ (Risks) |
വളരെ കുറവ് (1–2%) |
3–5% വരെ |
| കുറയുന്ന ഭാരം (TBWL) |
മൊത്തം ഭാരത്തിന്റെ 15–20% |
മൊത്തം ഭാരത്തിന്റെ 25–35% |
| വീണ്ടും ചെയ്യാൻ പറ്റുമോ? |
അതെ, വീണ്ടും തുന്നാൻ സാധിക്കും |
പരിമിതമായ സാധ്യതകൾ മാത്രം |
| നെഞ്ചെരിച്ചിൽ സാധ്യത |
വളരെ കുറവ് |
ഇടത്തരം മുതൽ കൂടുതൽ വരെ |
എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി വഴി എത്രത്തോളം ശരീരഭാരം കുറയും?
ശരിയായ ഭക്ഷണക്രമവും ആരോഗ്യകരമായ ജീവിതശൈലിയും പിന്തുടർന്നാൽ ESG-ലൂടെ മികച്ച ഫലം ലഭിക്കും.
15-20%: ചികിത്സ കഴിഞ്ഞ് 12 മുതൽ 24 മാസത്തിനുള്ളിൽ മൊത്തം ശരീരഭാരത്തിൽ ഉണ്ടാകുന്ന കുറവ് (Total Body Weight Loss).55-75%: രണ്ട് വർഷത്തിനുള്ളിൽ അമിതഭാരത്തിൽ (Excess Weight) നിന്നുണ്ടാകുന്ന കുറവ്.
12-18 മാസങ്ങൾ: പരമാവധി ഭാരം കുറയാൻ എടുക്കുന്ന സമയം.
5 വർഷത്തിലധികം: നല്ലൊരു ജീവിതശൈലി പിന്തുടർന്നാൽ ഈ ഫലം ദീർഘകാലം നിലനിൽക്കും.ശരീരഭാരം കുറയുന്നതിനൊപ്പം പ്രമേഹം, പ്രഷർ, ഫാറ്റി ലിവർ എന്നിവയിൽ വലിയ പുരോഗതി ഉണ്ടാകാൻ ESG സഹായിക്കുന്നു.
ശ്രദ്ധിക്കുക ESG എന്നത് ഒരു അത്ഭുത മരുന്നല്ല. കൃത്യമായ ഡയറ്റ്, വ്യായാമം, ആവശ്യമെങ്കിൽ GLP-1 റെസിപ്റ്റർ അഗോണിസ്റ്റ് (ഉദാഹരണത്തിന് സെമാഗ്ലൂട്ടൈഡ്) തുടങ്ങിയ മരുന്നുകൾ എന്നിവ ഇതിനോടൊപ്പം ആവശ്യമാണ്.
എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി സുരക്ഷിതമാണോ? പാർശ്വഫലങ്ങൾ എന്തൊക്കെയാണ്?
ലോകമെമ്പാടും വിജയകരമായി ചെയ്തുകൊണ്ടിരിക്കുന്ന ഏറ്റവും സുരക്ഷിതമായ ഒരു ചികിത്സാരീതിയാണിത്. വയർ മുറിച്ചു മാറ്റാത്തതിനാൽ ബരിയാട്രിക് സർജറിയേക്കാൾ സുരക്ഷിതത്വമുണ്ട്.സാധാരണയായി കാണുന്ന താൽക്കാലിക ബുദ്ധിമുട്ടുകൾ (1-2 ആഴ്ചയ്ക്കുള്ളിൽ മാറും):ആദ്യത്തെ 2-3 ദിവസങ്ങളിൽ ഓക്കാനവും ഛർദ്ദിയും.വയറുവേദന അല്ലെങ്കിൽ വലിഞ്ഞു മുറുകുന്ന അനുഭവം.വയർ വീർക്കുക, പെട്ടെന്ന് വയർ നിറഞ്ഞതായി തോന്നുക.ക്ഷീണം, വിശപ്പില്ലായ്മ, നേരിയ നെഞ്ചെരിച്ചിൽ തുടങ്ങിയ അനുഭവപ്പെട്ടേക്കാമെങ്കിലും പിന്നീട് മാറും.
അപൂർവ്വമായി ഉണ്ടാകാവുന്ന പ്രശ്നങ്ങൾ (1-2% സാധ്യത):വയറിന് ചുറ്റും നീർക്കെട്ട് വരിക.തുന്നലുകൾ അയഞ്ഞുപോവുക (ഇത് ദീർഘകാല ഫലത്തെ ബാധിക്കാം), നേരിയ ബ്ലീഡിംഗ് തുടങ്ങിയവ.
Read Also: പാൽ കുടിക്കുന്നത് ആരോഗ്യത്തിന് നല്ലതാണോ? തെറ്റിദ്ധാരണകളും വസ്തുതകളും
ഇഎസ്ജിക്ക് ശേഷം എപ്പോൾ ജോലിയിൽ തിരികെ പ്രവേശിക്കാം?
വളരെ വേഗത്തിൽ സുഖം പ്രാപിക്കാം എന്നതാണ് ESG-യുടെ ഏറ്റവും വലിയ പ്രത്യേകത.
ദിവസം 0–1: പ്രൊസീജിയർ പൂർത്തിയാക്കി 4-6 മണിക്കൂർ നിരീക്ഷണത്തിൽ വെയ്ക്കുന്നു. അന്നുതന്നെയോ പിറ്റേന്നോ ഡിസ്ചാർജ് ചെയ്യാം.
ദിവസം 1–3: വീട്ടിൽ വിശ്രമിക്കുക. നേരിയ വേദനയ്ക്കുള്ള മരുന്നുകൾ കഴിക്കാം. ദ്രാവകരൂപത്തിലുള്ള ആഹാരം (Clear Liquids) മാത്രം കഴിക്കുക.ദിവസം 3–7: ഓഫീസ് ജോലികൾ ചെയ്യുന്നവർക്ക് 5-ാം ദിവസം മുതൽ ജോലിയിൽ പ്രവേശിക്കാം. ക്ഷീണം മാറിക്കൊണ്ടിരിക്കും.
രണ്ടാം ആഴ്ച: സാധാരണ ദൈനംദിന കാര്യങ്ങൾ പൂർണ്ണമായി ചെയ്യാം.
4–6 ആഴ്ചകൾ: നടത്തം, നീന്തൽ, ജിം വ്യായാമങ്ങൾ എന്നിവ ആരംഭിക്കാം.
ഓഫീസ് ജോലിക്കാർക്ക്: 3 മുതൽ 7 ദിവസത്തിനുള്ളിൽ ജോലിക്ക് പോകാം.
കഠിനമായ ശാരീരിക അധ്വാനം ഉള്ളവർ 2 ആഴ്ച വരെ വിശ്രമിക്കണം.
ചികിത്സയ്ക്ക് ശേഷമുള്ള ഭക്ഷണക്രമം
വയറിന്റെ ഭിത്തികൾ സുഖപ്പെടാനും മികച്ച ഫലം ലഭിക്കാനും ഘട്ടം ഘട്ടമായുള്ള ഡയറ്റ് പ്ലാൻ കൃത്യമായി പാലിക്കണം (6-8 ആഴ്ചകൾ).
ഘട്ടം 1 (1–2 ആഴ്ചകൾ) - തെളിഞ്ഞ ദ്രാവകങ്ങൾ മാത്രം (Clear Liquids)വെള്ളം, കഞ്ഞിവെള്ളം, ഇളനീർ, ഒആർഎസ് (ORS), പ്രോട്ടീൻ ഷേക്കുകൾ. ഒരു സമയം 100-150 മില്ലി ലിറ്ററിൽ കൂടുതൽ കുടിക്കരുത്. സോഡാ, കാപ്പി എന്നിവ പൂർണ്ണമായി ഒഴിവാക്കുക.
ഘട്ടം 2 (3–4 ആഴ്ചകൾ) - അർദ്ധ ദ്രാവകങ്ങൾ / പ്യൂരി ആഹാരങ്ങൾ (Full Liquids / Purées)അടിച്ചെടുത്ത തൈര്, പരിപ്പ് വേവിച്ച് ഉടച്ചത്, ബ്ലെൻഡ് ചെയ്ത സൂപ്പുകൾ, പഴങ്ങളുടെ പൾപ്പ് ഇല്ലാത്ത ജ്യൂസുകൾ. ദിവസവും 60-80 ഗ്രാം പ്രോട്ടീൻ ലഭിക്കുന്നുണ്ടെന്ന് ഉറപ്പാക്കുക.
ഘട്ടം 3 (5–6 ആഴ്ചകൾ) - മൃദുവായ ആഹാരങ്ങൾ (Soft Foods)നന്നായി വെന്ത മീൻ, മുട്ടയുടെ വെള്ള, വേവിച്ച പരിപ്പ് വർഗ്ഗങ്ങൾ, ഉടച്ച പച്ചക്കറികൾ, സോഫ്റ്റ് പനീർ. ചെറിയ അളവിൽ മാത്രം (കാൽ കപ്പ് മുതൽ അര കപ്പ് വരെ) ഭക്ഷണം 20 മിനിറ്റിലധികം സമയമെടുത്ത് പതുക്കെ ചവച്ചരച്ച് കഴിക്കുക.
ഘട്ടം 4 (7 ആഴ്ചയ്ക്ക് ശേഷം) - സാധാരണ ആരോഗ്യകരമായ ഭക്ഷണം (Regular Healthy Diet)പ്രോട്ടീൻ, പച്ചക്കറികൾ, തവിടുള്ള ധാന്യങ്ങൾ എന്നിവ അടങ്ങിയ സമീകൃതാഹാരം. മധുരം കൂടിയതും, വറുത്തതും, പാക്കറ്റ് ഭക്ഷണങ്ങളും പൂർണ്ണമായി ഒഴിവാക്കണം. ദിവസവും 4-5 തവണ ചെറിയ അളവിൽ കഴിക്കുക.പ്രധാന നിയമങ്ങൾ:പതുക്കെ കഴിക്കുക; വയർ നിറഞ്ഞതായി തോന്നിയാൽ ഉടൻ നിർത്തുക.ഭക്ഷണത്തിന് 30 മിനിറ്റ് മുൻപും പിൻപും വെള്ളം കുടിക്കരുത്.ഡോക്ടർ നിർദ്ദേശിക്കുന്ന മൾട്ടി വൈറ്റമിൻ, വൈറ്റമിൻ D, B12, ഇരുമ്പ് (Iron) ഗുളികകൾ കൃത്യമായി കഴിക്കുക.
ESG ഒരു ശാശ്വത പരിഹാരമാണോ?
ശസ്ത്രക്രിയ പോലെ വയർ മുറിച്ചു മാറ്റാത്തതിനാൽ, കാലക്രമേണ (ഏകദേശം 18-24 മാസങ്ങൾക്കുള്ളിൽ) 15-20% രോഗികളിൽ ഇട്ട തുന്നലുകൾക്ക് നേരിയ അയവ് വരാൻ സാധ്യതയുണ്ട്. ഇത് വീണ്ടും വണ്ണം വെയ്ക്കാൻ കാരണമായേക്കാം.എങ്കിലും, കൃത്യമായ ജീവിതശൈലിയും ഡയറ്റും പിന്തുടരുന്ന ഭൂരിഭാഗം ആളുകളിലും 5 വർഷത്തിലധികം ഈ ഫലം നിലനിൽക്കുന്നതായി പഠനങ്ങൾ തെളിയിക്കുന്നു.പ്രത്യേകത: തുന്നലുകൾ അയഞ്ഞുപോയാൽ ESG വീണ്ടും ചെയ്യാൻ സാധിക്കും.ആവശ്യമാണെങ്കിൽ ഇതിനെ പിന്നീട് ഒരു സർജറിയാക്കി മാറ്റാനും കഴിയും.GLP-1 മരുന്നുകൾക്കൊപ്പം ESG ചെയ്യുന്നത് ഭാരം കൂടാതെ നിലനിർത്താൻ സഹായിക്കും.
എന്തുകൊണ്ട് ESG തിരഞ്ഞെടുക്കണം?
മുറിവുകളോ തുന്നലുകളോ പാടുകളോ ഇല്ല.ചികിത്സ കഴിഞ്ഞ ഉടൻ വീട്ടിലേക്ക് പോകാം.ഒരാഴ്ചയ്ക്കുള്ളിൽ ജോലിയിൽ തിരിച്ചെത്താം.ആവശ്യമെങ്കിൽ പഴയപടിയാക്കാം (Reversible), വീണ്ടും ചെയ്യാം (Repeatable).പാർശ്വഫലങ്ങൾ വളരെ കുറവാണ്.മറ്റ് സർജറികളെപ്പോലെ പോഷകാഹാരക്കുറവ് (Nutritional Deficiency) ഉണ്ടാകുന്നില്ല.സർജറി ചെയ്യാൻ ഭയമുള്ളവർക്കും മറ്റ് ആരോഗ്യപ്രശ്നങ്ങൾ ഉള്ളവർക്കും ഏറ്റവും സുരക്ഷിതം.
ഇന്ത്യയിൽ ESG ചികിത്സയ്ക്ക് എത്ര ചിലവ് വരും?
ഉയർന്ന നിലവാരമുള്ള ഉപകരണങ്ങളും വിദഗ്ദ്ധ ഡോക്ടർമാരുടെ സേവനവും ആവശ്യമുള്ളതിനാൽ ആശുപത്രിയും നഗരവും അനുസരിച്ച് ചിലവുകളിൽ മാറ്റം വരാം.
ചികിത്സയ്ക്ക് മുൻപുള്ള എൻഡോസ്കോപ്പി, രക്തപരിശോധന, ഡയറ്റീഷ്യൻ ഫീസ്, പ്രൊസീജിയർ ചാർജ്ജ്, ഓവർസ്റ്റിച്ച് ഉപകരണങ്ങളുടെ ചിലവ്.അനസ്തേഷ്യ, ഹോസ്പിറ്റൽ സ്റ്റേ.ഡിസ്ചാർജ് ചെയ്യുമ്പോൾ നൽകുന്ന മരുന്നുകൾ ഉൾപ്പെടെയാണ് മിക്കയിടത്തും നിരക്ക് കണക്കാക്കുന്നത്. കൂടാതെ, ചികിത്സയ്ക്ക് ശേഷം 3 മുതൽ 6 മാസം വരെയുള്ള ഫോളോ-അപ്പ് പരിശോധനകളും ആവശ്യമായി വന്നേക്കാം.അമിതവണ്ണത്തിൽ നിന്ന് മുക്തി നേടാൻ ആഗ്രഹിക്കുന്നവർക്ക് ശസ്ത്രക്രിയയില്ലാത്ത ഏറ്റവും ഫലപ്രദമായ ഒരു ശാസ്ത്രീയ മാർഗ്ഗമാണ് ESG.
(ശ്രദ്ധിക്കുക:എൻഡോസ്കോപ്പിക് സ്ലീവ് ഗ്യാസ്ട്രോപ്ലാസ്റ്റി പ്രൊസീജറിന് ഇൻഷുറൻസ് പരിരക്ഷ ലഭ്യമാണോ എന്ന് നിങ്ങളുടെ ഇൻഷുറൻസ് കമ്പനിയുമായി മുൻകൂട്ടി സംസാരിച്ച് ഉറപ്പുവരുത്തുക).
കൂടുതൽ വിവരങ്ങൾക്ക് കോഴിക്കോട് ബേബി മെമ്മോറിയൽ ആശുപത്രിയിലെ ഒബീസിറ്റി ക്ലിനിക്കുമായി ബന്ധപ്പെടാം
Phone Number- +91 90483 90039
