കുട്ടികളിലെ അമിത രക്തസമ്മർദ്ദം: ലക്ഷണങ്ങളും പ്രതിരോധവും

ജീവിതശൈലീ രോഗങ്ങൾ മുതിർന്നവരെ മാത്രം ബാധിക്കുന്ന ഒന്നാണെന്ന ധാരണ തിരുത്തപ്പെടേണ്ട കാലം അതിക്രമിച്ചിരിക്കുന്നു. മാറിയ ഭക്ഷണരീതികളും ജീവിതശൈലിയും   നമ്മുടെ കുഞ്ഞുങ്ങളുടെ ആരോഗ്യത്തെയും സാരമായി ബാധിച്ചു തുടങ്ങിയിരിക്കുന്നു. ലോക  രക്താതിമർദ്ദ  ദിനത്തിൽ നാം ഗൗരവമായി ചർച്ച ചെയ്യേണ്ട ഒന്നാണ് കുട്ടികളിലെ അമിത രക്തസമ്മർദ്ദം അഥവാ 'പീഡിയാട്രിക് ഹൈപ്പർടെൻഷൻ' (Pediatric Hypertension).

പലപ്പോഴും യാതൊരു ലക്ഷണങ്ങളും പ്രകടിപ്പിക്കാത്തതിനാൽ 'നിശബ്ദനായ കൊലയാളി' എന്ന് വിളിക്കപ്പെടുന്ന ഈ അവസ്ഥ കുട്ടികളിൽ തിരിച്ചറിയപ്പെടാതെ പോകുന്നത് ഭാവിയിൽ ഗുരുതരമായ ആരോഗ്യപ്രശ്നങ്ങൾക്ക് കാരണമാകും. കുട്ടികളിലെ  കുട്ടികളിലെ ഉയർന്ന രക്തസമ്മർദ്ദം നേരത്തെ തിരിച്ചറിയേണ്ടതിന്റെ ആവശ്യകതയെക്കുറിച്ചും, ഈ സാഹചര്യത്തെ പ്രതിരോധിക്കാൻ രക്ഷിതാക്കൾ ശ്രദ്ധിക്കേണ്ട കാര്യങ്ങളെക്കുറിച്ചും വരുത്തേണ്ട മാറ്റങ്ങളെക്കുറിച്ചും കോഴിക്കോട് ബേബി മെമ്മോറിയൽ ആശുപത്രിയിലെ പീഡിയാട്രിക് ആന്‍ഡ്  നിയോനാറ്റോളജി  കണ്‍സള്‍ട്ടന്റ് ഡോ ഫെബിന എ റഹിമാന്‍ സംസാരിക്കുന്നു

പലപ്പോഴും കുട്ടികളിൽ  രക്തസമ്മർദ്ദം പരിശോധിക്കുന്നത് കുറവാണ്. ലക്ഷണങ്ങൾ പ്രകടിപ്പിക്കാത്ത സാഹചര്യത്തിൽ കുട്ടികളിലെഅമിത രക്തസമ്മർദ്ദം എങ്ങനെ  കണ്ടെത്താം?

കുട്ടികളിൽ ഉയർന്ന രക്തസമ്മർദ്ദം  (പീഡിയാട്രിക് ഹൈപ്പർടെൻഷൻ) സാധാരണയായി മുതിർന്നവരുടേതുപോലുള്ള  ലക്ഷണങ്ങളൊന്നും ഇല്ലാതെയായിരിക്കും വരിക. അതുകൊണ്ട് തന്നെ കൃത്യമായി നിരീക്ഷിക്കുന്നതാണ്  കണ്ടെത്താനുള്ള മാർഗം.

 കണ്ടെത്തലിനുള്ള പ്രധാന ഘട്ടങ്ങൾ:

കൃത്യമായ പരിശോധന – മൂന്ന് വയസ്സിനു മുകളിലുള്ള കുട്ടികൾക്ക് വർഷത്തിൽ ഒരിക്കലെങ്കിലും, രക്തസമ്മർദ്ദം പരിശോധിക്കണം. ഹൈപ്പർടെൻഷൻ സാധ്യതയുള്ള കുട്ടികളെ (അമിതവണ്ണം, വൃക്കരോഗം, steroid  പോലുള്ള മരുന്നു ഉപയോഗിക്കുന്നവർ തുടങ്ങിയവർ കൂടുതൽ ഇടവേളകളിൽ നേരത്തെ തന്നെ പരിശോധന ആരംഭിക്കണം.

ശരിയായ അളക്കൽ  – കുട്ടി ശാന്തമായി  ഇരിക്കുമ്പോൾ, ശരിയായ വലുപ്പത്തിലുള്ള കഫ് ഉപയോഗിച്ച്, കൈ ഹൃദയനിരപ്പിൽ വെച്ചാണ്  അളക്കേണ്ടത്.

പലതവണ അളക്കുക – ഒരു അളവിനെ ആശ്രയിച്ച് ഹൈപ്പർടെൻഷൻ എന്ന് പറയാനാവില്ല. മൂന്നു വ്യത്യസ്ത സന്ദർശനങ്ങളിലായി എടുത്ത അളവുകൾ ശരാശരി 95  ശതമാനത്തിനും മുകളിൽ വരുമ്പോഴാണ് ഹൈപ്പർടെൻഷൻ സ്ഥിരീകരിക്കുക

ആംബുലേറ്ററി മോണിറ്ററിംഗ് – “വൈറ്റ് കോട്ട്ഹൈപ്പർടെൻഷൻ” (ഡോക്ടറുടെ മുന്നിൽ മാത്രമുള്ള രക്തസമ്മർദ്ദ ഉയർച്ച) ഒഴിവാക്കാൻ ചിലപ്പോൾ കുട്ടികൾ 24 മണിക്കൂറോളം രക്തസമ്മർദ്ദം അളക്കുന്ന ഉപകരണം ഉപയോഗിക്കാറുണ്ട്. 

വീട്ടിലെ നിരീക്ഷണം – മാതാപിതാക്കൾക്ക് ലളിതമായ ഡിജിറ്റൽ കഫ് ഉപയോഗിച്ച് വീട്ടിൽ തന്നെ നിരീക്ഷിക്കാം. ഒരേ സമയങ്ങളിൽ, രാവിലെ-വൈകുന്നേരം രണ്ടു തവണ വീതം കുറച്ചു ദിവസത്തേയ്ക്ക്   അളക്കുന്നത് കൂടുതൽ കൃത്യത നൽകും .

ഇതുപോലെ നിരന്തരം നിരീക്ഷിക്കുകയാണെങ്കിൽ ലക്ഷണങ്ങൾ കാണാത്തതായാലും കുട്ടികളിലെ രക്തസമ്മർദ്ദ വർധന നേരത്തെ തിരിച്ചറിയാൻ കഴിയും.

Read Also: ശസ്ത്രക്രിയയില്ലാതെ മുടി വളർത്താം: പിആർപി ചികിത്സയുടെ ഗുണങ്ങളും ചെലവും

ഏത് പ്രായം മുതലാണ് കുട്ടികളിൽ രക്തസമ്മർദ്ദം പതിവായി പരിശോധിച്ചു തുടങ്ങേണ്ടത്? സാധാരണ ഹെൽത്ത് ചെക്കപ്പുകളിൽ ഇത് നിർബന്ധമാക്കേണ്ടതുണ്ടോ?

സാധാരണയായി, കുട്ടികൾക്ക് 3 വയസ്സ് തികയുന്നത് മുതൽ വർഷത്തിലൊരിക്കൽ രക്തസമ്മർദ്ദം പരിശോധിച്ചു തുടങ്ങണം എന്നാണ് അമേരിക്കൻ അക്കാദമി ഓഫ് പീഡിയാട്രിക്സ് (AAP) ഉൾപ്പെടെയുള്ള പ്രമുഖ ആരോഗ്യ സംഘടനകൾ നിർദ്ദേശിക്കുന്നത്.കുട്ടികളുടെ പൂർണ്ണമായ ആരോഗ്യ പരിശോധനയുടെ അവിഭാജ്യ ഘടകമാണിത്.

മൂന്നു വയസ്സിന് മുകളിലുള്ള കുട്ടികളെ ഡോക്ടറെ കാണിക്കാനോ വാർഷിക ആരോഗ്യ പരിശോധനകൾക്കോ കൊണ്ടുപോകുമ്പോൾ അവരുടെ രക്തസമ്മർദ്ദം അളക്കുന്നത് ഒരു പതിവാക്കേണ്ടതാണ്.

മാസം തികയാതെയുള്ള ജനനം,ജന്മനായുള്ള ഹൃദ്രോഗങ്ങൾ, വൃക്കരോഗങ്ങൾ എന്നിവ ഉള്ളവർ, ആവർത്തിച്ചുള്ള മൂത്രാശയ അണുബാധ (UTI) ഉള്ളവർ അല്ലെങ്കിൽ ബിപി വർദ്ധിപ്പിക്കാൻ സാധ്യതയുള്ള മരുന്നുകൾ കഴിക്കുന്ന കുട്ടികൾ തുടങ്ങിയവരിൽ മൂന്നുവയസ്സുവരെ കാത്തിരിക്കാതെ നേരത്തെ തന്നെ  ബി. പി പരിശോധിക്കേണ്ടതുണ്ട്.

എന്തുകൊണ്ടാണ് കുട്ടികളിലെ ഈ പരിശോധന പ്രധാനമാകുന്നത്?

ലക്ഷണങ്ങൾ ഇല്ലാത്ത അവസ്ഥ (Silent Condition): ഉയർന്ന രക്തസമ്മർദ്ദത്തിന് പലപ്പോഴും പുറമെ കാണാവുന്ന ലക്ഷണങ്ങൾ ഉണ്ടാകില്ല. കൃത്യമായ പരിശോധനയിലൂടെ മാത്രമേ ഇത് കണ്ടെത്താനാകൂ.

മറ്റ് അസുഖങ്ങളുടെ സൂചന: കുട്ടികളിലെ ഉയർന്ന ബിപി പലപ്പോഴും ഹൃദയം, വൃക്ക എന്നിവയുമായി ബന്ധപ്പെട്ട മറ്റെന്തെങ്കിലും അസുഖങ്ങളുടെ ആദ്യസൂചനയാകാം.

ജീവിതശൈലി മാറ്റങ്ങൾ: ഇന്നത്തെ കാലത്ത് കുട്ടികളിൽ കൂടുതലായി കണ്ടുവരുന്ന അമിതവണ്ണവും (Obesity) വ്യായാമമില്ലായ്മയും രക്തസമ്മർദ്ദം വർദ്ധിക്കാൻ കാരണമാകുന്നുണ്ട്. നേരത്തെ കണ്ടെത്തിയാൽ ഭക്ഷണക്രമത്തിലൂടെയും വ്യായാമത്തിലൂടെയും ഇത് എളുപ്പത്തിൽ നിയന്ത്രിക്കാം.

കുട്ടികളിലെ അമിത രക്തസമ്മർദ്ദത്തിന്റെ പ്രധാന കാരണങ്ങൾ എന്തൊക്കെയാണ്?

കുട്ടികളിലെ അമിത രക്തസമ്മർദ്ദം ഇന്ന് വർദ്ധിച്ചുവരുന്ന ഒരു ആരോഗ്യപ്രശ്നമാണ്. അമിതവണ്ണം, ഭക്ഷണരീതി, ജനിതക കാരണങ്ങൾ എന്നിവയെല്ലാം ഇതിൽ വളരെ വലിയ പങ്കുവഹിക്കുന്നുണ്ട്.

കുട്ടികളിലെ രക്തസമ്മർദ്ദത്തിന്റെ കാരണങ്ങളെ പ്രധാനമായും രണ്ടായി തിരിക്കാം: പ്രാഥമിക കാരണങ്ങൾ (Primary Hypertension), ദ്വിതീയ കാരണങ്ങൾ (Secondary Hypertension).

1. പ്രാഥമിക കാരണങ്ങൾ (ജീവിതശൈലിയും പാരമ്പര്യവും)

മുതിർന്ന കുട്ടികളിലും കൗമാരക്കാരിലുമാണ് ഇത് കൂടുതലായി കാണപ്പെടുന്നത്. 

• അമിതവണ്ണം (Obesity): കുട്ടികളിലെ അമിത രക്തസമ്മർദ്ദത്തിനുള്ള ഏറ്റവും പ്രധാനപ്പെട്ട കാരണങ്ങളിലൊന്ന് അമിതവണ്ണമാണ്..

• മോശമായ ഭക്ഷണരീതി (Unhealthy Diet): ഉപ്പ് (സോഡിയം) കൂടുതലടങ്ങിയ ജങ്ക് ഫുഡുകൾ, ബേക്കറി പലഹാരങ്ങൾ, പ്രോസസ് ചെയ്ത ഭക്ഷണങ്ങൾ, മധുരം കൂടുതലുള്ള പാനീയങ്ങൾ എന്നിവ സ്ഥിരമായി കഴിക്കുന്നത് രക്തസമ്മർദ്ദം കൂട്ടാൻ കാരണമാകും.

• ജനിതക കാരണങ്ങൾ (Genetics / Family History): മാതാപിതാക്കൾക്കോ അടുത്ത കുടുംബാംഗങ്ങൾക്കോ അമിത രക്തസമ്മർദ്ദം ഉണ്ടെങ്കിൽ കുട്ടികൾക്കും ഇത് വരാനുള്ള സാധ്യത കൂടുതലാണ്.

• വ്യായാമക്കുറവ് (Lack of Physical Activity): എപ്പോഴും ടിവിയോ മൊബൈലോ നോക്കിയിരിക്കുന്നതും, പുറത്തിറങ്ങിയുള്ള കളികളിലും വ്യായാമത്തിലും ഏർപ്പെടാതിരിക്കുന്നതും ഈ അവസ്ഥയ്ക്ക് ആക്കം കൂട്ടുന്നു.

2. ദ്വിതീയ കാരണങ്ങൾ (മറ്റ് അസുഖങ്ങൾ)

ചെറിയ കുട്ടികളിലും നവജാത ശിശുക്കളിലും അമിത രക്തസമ്മർദ്ദം കാണുകയാണെങ്കിൽ, അത് മിക്കവാറും ശരീരത്തിലെ മറ്റ് ചില അസുഖങ്ങളുടെ ലക്ഷണമായിരിക്കും.

• വൃക്കരോഗങ്ങൾ (Kidney Diseases): ചെറിയ കുട്ടികളിലെ രക്തസമ്മർദ്ദത്തിന്റെ ഏറ്റവും പ്രധാനപ്പെട്ട കാരണം വൃക്കകളിലെ തകരാറുകളോ വൃക്കയിലേക്കുള്ള രക്തക്കുഴലുകളുടെ ചുരുക്കമോ ആണ്.

• ഹൃദയസംബന്ധമായ പ്രശ്നങ്ങൾ (Heart Defects): ജന്മനായുള്ള ഹൃദയവൈകല്യങ്ങൾ (ഉദാഹരണത്തിന്, അയോർട്ട എന്ന പ്രധാന രക്തക്കുഴലിന്റെ സങ്കോചം) രക്തസമ്മർദ്ദം വർദ്ധിപ്പിക്കാം.

• ഹോർമോൺ വ്യതിയാനങ്ങൾ (Hormonal Disorders): തൈറോയ്ഡ് പ്രശ്നങ്ങൾ, അഡ്രിനൽ ഗ്രന്ഥിയുടെ തകരാറുകൾ തുടങ്ങിയ ഹോർമോൺ പ്രശ്നങ്ങളും ഇതിന് കാരണമാകാം.

• ചില മരുന്നുകളുടെ ഉപയോഗം: ആസ്ത്മ, ജലദോഷം, എഡിഎച്ച്ഡി (ADHD) തുടങ്ങിയവയ്ക്കുള്ള ചില മരുന്നുകൾ സ്ഥിരമായി ഉപയോഗിക്കുന്നത് ചിലപ്പോൾ രക്തസമ്മർദ്ദം കൂട്ടാറുണ്ട്.

വൃക്കരോഗങ്ങൾ, ഹൃദയസംബന്ധമായ പ്രശ്നങ്ങൾ അല്ലെങ്കിൽ ഹോർമോൺ വ്യതിയാനങ്ങൾ എന്നിവ കുട്ടികളിലെ രക്തസമ്മർദ്ദത്തെ എത്രത്തോളം ബാധിക്കുന്നുണ്ട്?

കുട്ടികളിലെ  രക്തസമ്മർദ്ദത്തെ ഈ മൂന്നു കാരണങ്ങളും ഗൗരവമായി ബാധിക്കാം, പ്രത്യേകിച്ച് വൃക്കരോഗങ്ങൾ അമിത രക്തസമ്മർദ്ദത്തിന്റെ ഏറ്റവും ശക്തമായ കാരണങ്ങളിൽ ഒന്നാണ്. 12 വയസ്സിൽ താഴെയുള്ള കുട്ടികളിൽ ഉണ്ടാകുന്ന രക്തസമ്മർദ്ദത്തിൽ 70% മുതൽ 85% വരെയും സെക്കൻഡറി ഹൈപ്പർടെൻഷൻ (Secondary hypertension - മറ്റ് രോഗങ്ങൾ കാരണം ഉണ്ടാകുന്നത്) ആണ്. അതുകൊണ്ടുതന്നെ ചെറിയ കുട്ടികളിൽ പ്രൈമറി ഹൈപ്പർടെൻഷനേക്കാൾ സാധാരണയായി കണ്ടുവരുന്നത് സെക്കൻഡറി ഹൈപ്പർടെൻഷൻ ആണ്. എന്നാൽ, കൗമാരപ്രായക്കാരിൽ (12-18 വയസ്സ്) പ്രൈമറി (എസൻഷ്യൽ) ഹൈപ്പർടെൻഷൻ ആണ് കൂടുതൽ കൂടുതലായി കണ്ടുവരുന്നത്; ഇവരിൽ സെക്കൻഡറി കാരണങ്ങൾ 10% മുതൽ 15% വരെ കേസുകളിൽ മാത്രമേ ഉണ്ടാകാറുള്ളൂ.

കുട്ടികളിലുണ്ടാകുന്ന സെക്കൻഡറി ഹൈപ്പർടെൻഷൻ കേസുകളിൽ 77% മുതൽ 97% വരെയും സംഭവിക്കുന്നത് വൃക്കകളെ നേരിട്ട് ബാധിക്കുന്ന രോഗങ്ങളും (Intrinsic kidney diseases) വൃക്കകളിലെ രക്തക്കുഴലുകളെ ബാധിക്കുന്ന രോഗങ്ങളും (Renovascular diseases) കാരണമാണ്.

ആരോഗ്യകരമായ ജീവിതശൈലി പിന്തുടരുന്നതിനോടൊപ്പം അമിത രക്തസമ്മർദ്ദത്തിന്റെ അടിസ്ഥാന കാരണം നേരത്തെ കണ്ടെത്തുകയും ചികിത്സിക്കുകയും  ചെയ്താൽ, കുട്ടികളിലെ സെക്കൻഡറി ഹൈപ്പർടെൻഷൻ (Secondary Hypertension) ഭേദമാകാനുള്ള സാധ്യത പൊതുവെ വളരെ കൂടുതലാണ്.

മരുന്ന് കഴിക്കാതെ തന്നെ ജീവിതശൈലിയിലെ മാറ്റങ്ങൾ കൊണ്ട് മാത്രം കുട്ടികളിൽ രക്തസമ്മർദ്ദം പൂർണ്ണമായും നിയന്ത്രിക്കുവാൻ സാധിക്കുമോ?

കുട്ടികളിൽ അമിത രക്തസമ്മർദ്ദം ചിലപ്പോഴൊക്കെ ജീവിതശൈലി മാറ്റങ്ങൾ മാത്രം കൊണ്ടുതന്നെ നല്ല തോതിൽ നിയന്ത്രിക്കാൻ കഴിയും, സമ്മര്‍ദ്ദത്തിന്റെ അളവിനെയും കാരണത്തെയും കൂടി ആശ്രയിച്ചേ ഇത്  തീരുമാനിക്കാന്‍ സാധിക്കൂ. അമിതവണ്ണം, അധിക ഉപ്പ് ഉപയോഗം, വ്യായാമക്കുറവ് തുടങ്ങിയവ പ്രധാന കാരണങ്ങളാണെങ്കിൽ ഭക്ഷണ ക്രമീകരണം, വ്യായാമം, ഭാരം കുറയ്ക്കൽ എന്നിവ വലിയ സഹായം ചെയ്യും.

എല്ലായ്‌പ്പോഴും ജീവിതശൈലി നിയന്ത്രണം മാത്രംകൊണ്ട് നിയന്ത്രണം സാധിക്കില്ല. എന്നാല്‍

• രക്തസമ്മർദ്ദം നേരിയ തോതിൽ മാത്രം ഉയർന്നിരിക്കുന്നപ്പോൾ.

• അമിതവണ്ണം, അനാരോഗ്യകരമായ ഭക്ഷണം, ശാരീരിക പ്രവർത്തനക്കുറവ് എന്നിവ പ്രധാന കാരണങ്ങളാകുമ്പോള്‍

• ഡോക്ടർ മറ്റേതെങ്കിലും അടിയന്തര കാരണമോ വൃക്ക/ഹോർമോൺ പ്രശ്നമോ കണ്ടെത്താത്തപ്പോൾ

 തുടങ്ങിയ സന്ദര്‍ഭങ്ങളില്‍ ജീവിതശൈലി നിയന്ത്രണം ഗുണം ചെയ്യും

എപ്പോൾ മരുന്ന് വേണ്ടിവരാം

• രക്തസമ്മർദ്ദം കൂടുതലായി ഉയർന്നിരിക്കുന്നപ്പോൾ.

• വൃക്കരോഗം, ഹൃദയപ്രശ്നം, ഹോർമോൺ പ്രശ്നം പോലുള്ള അടിസ്ഥാന രോഗങ്ങൾ ഉണ്ടെങ്കിൽ.

• ജീവിതശൈലി മാറ്റങ്ങൾ ചെയ്തിട്ടും ലക്ഷ്യനിലയിൽ എത്താത്തപ്പോൾ

കുട്ടികളിൽ രക്തസമ്മർദ്ദം കണ്ടെത്തിയാല്‍ മാതാപിതാക്കള്‍ സ്വയം തീരുമാനിച്ച് ഇത് കൈകാര്യം ചെയ്യുവാന്‍ ശ്രമിക്കരുത്. രക്‌സമ്മര്‍ദ്ദത്തിന്റെ അളവ്, കാരണം,  പ്രായം തുടങ്ങിയ ഘടകങ്ങള്‍ ഡോക്ടറുമായി സംസാരിച്ച് വേണം മരുന്ന് കഴിക്കണോ വേണ്ടയോ തുടങ്ങിയ കാര്യങ്ങള്‍ തീരുമാനിക്കാവൂ.

ഭക്ഷണക്രമത്തിൽ വരുത്തേണ്ട പ്രധാന മാറ്റങ്ങൾ എന്തൊക്കെയാണ്? ഉപ്പിന്റെ ഉപയോഗം കുറയ്ക്കുന്നതല്ലാതെ DASH Diet പോലുള്ള പ്രത്യേക രീതികൾ കുട്ടികൾക്ക് അനുയോജ്യമാണോ?

കുട്ടികളിലെ രക്തസമ്മർദ്ദം (Pediatric Hypertension) ഇന്ന് ഒരു പ്രധാന ആരോഗ്യപ്രശ്നമായി മാറിക്കൊണ്ടിരിക്കുകയാണ്. ഇതിനെ പ്രതിരോധിക്കാൻ ഭക്ഷണക്രമത്തിൽ വരുത്തേണ്ട മാറ്റങ്ങൾ മുതിർന്നവരുടേതിൽ നിന്നും അല്പം വ്യത്യസ്തമാണ്. കുട്ടികൾക്ക് DASH Diet തികച്ചും അനുയോജ്യമാണെന്ന് മാത്രമല്ല, വിദഗ്ധർ ഇത് ശക്തമായി ശുപാർശ ചെയ്യുകയും ചെയ്യുന്നുണ്ട്.

DASH Diet കുട്ടികളിൽ: പ്രധാന ഘടകങ്ങൾ

DASH ഡയറ്റ് കേവലം ഉപ്പ് കുറയ്ക്കൽ മാത്രമല്ല, മറിച്ച് രക്തസമ്മർദ്ദം നിയന്ത്രിക്കുന്ന പോഷകങ്ങൾ (Potassium, Magnesium, Calcium) വർദ്ധിപ്പിക്കുക കൂടിയാണ്.

• പൊട്ടാസ്യം വർദ്ധിപ്പിക്കുക: ശരീരത്തിലെ സോഡിയത്തിന്റെ ആഘാതം കുറയ്ക്കാൻ പൊട്ടാസ്യം സഹായിക്കും. ഏത്തപ്പഴം, ഓറഞ്ച്, ചീര, ഉരുളക്കിഴങ്ങ്, കരിക്കിൻ വെള്ളം എന്നിവ ഭക്ഷണത്തിൽ ഉൾപ്പെടുത്തുക.

• നാരുകൾ (Fiber): തവിടുള്ള ധാന്യങ്ങൾ (Whole grains), പയറുവർഗ്ഗങ്ങൾ എന്നിവ നൽകുക. ഇത് രക്തക്കുഴലുകളുടെ ആരോഗ്യത്തിന് നല്ലതാണ്.

• പഞ്ചസാരയുടെ നിയന്ത്രണം: സോഡകൾ, പാക്കറ്റ് ജ്യൂസുകൾ, സ്പോർട്സ് ഡ്രിങ്കുകൾ എന്നിവ ഒഴിവാക്കുക. അമിതമായ പഞ്ചസാര ഇൻസുലിൻ അളവ് വർദ്ധിപ്പിക്കുകയും അത് പരോക്ഷമായി രക്തസമ്മർദ്ദം കൂട്ടുകയും ചെയ്യും.

• നല്ല കൊഴുപ്പ്: വറുത്തതും പൊരിച്ചതുമായ ഭക്ഷണത്തിന് പകരം ഒമേഗ-3 അടങ്ങിയ മീനുകൾ, അണ്ടിപ്പരിപ്പുകൾ (നട്സ്) എന്നിവ നൽകുക.

കുട്ടികൾക്ക് ഡയറ്റ് ഒരു ശിക്ഷയായി തോന്നാത്ത രീതിയിൽ വേണം നടപ്പിലാക്കാൻ.

മാതാപിതാക്കൾ ശ്രദ്ധിക്കാൻ

1. ഭക്ഷണ ലേബലുകൾ ശ്രദ്ധിക്കുക: 'Low Sodium' അല്ലെങ്കിൽ 'No added salt' എന്ന് രേഖപ്പെടുത്തിയ ഉൽപ്പന്നങ്ങൾ തിരഞ്ഞെടുക്കുക.

2. വീട്ടിലെ എല്ലാവരും ശീലിക്കുക: കുട്ടിക്ക് മാത്രം പ്രത്യേക ഭക്ഷണം നൽകാതെ, കുടുംബം മുഴുവൻ ആരോഗ്യകരമായ ഈ രീതി പിന്തുടരുന്നത് കുട്ടിയെ മാനസികമായി സഹായിക്കും.

കൂടാതെ,കുട്ടികളിലെ രക്തസമ്മർദ്ദം നിയന്ത്രിക്കുന്നതിനായി പാക്കറ്റ് ഭക്ഷണങ്ങൾ ഒഴിവാക്കി പകരം പാൽ, മോര്, ഫ്രഷ് പഴച്ചാറുകൾ എന്നിവ ശീലമാക്കേണ്ടതാണ്. ബേക്കറി പലഹാരങ്ങൾക്ക് പകരം മുളപ്പിച്ച പയർ വർഗ്ഗങ്ങളും പഴങ്ങളും നൽകുന്നതിനൊപ്പം, ഭക്ഷണത്തിൽ ഉപ്പിന്റെ അളവ് കുറച്ച് രുചിക്കായി നാരങ്ങാനീര്, ഇഞ്ചി, കുരുമുളക് തുടങ്ങിയവ ഉൾപ്പെടുത്താനും ശ്രദ്ധിക്കണം.

അമിതമായ ഡിജിറ്റൽ സ്ക്രീൻ സമയം (മൊബൈൽ, ടിവി), ഉറക്കക്കുറവ്, പഠനഭാരം മൂലമുണ്ടാകുന്ന മാനസിക സമ്മർദ്ദം എന്നിവ രക്തസമ്മർദ്ദം വർദ്ധിക്കാൻ കാരണമാകുന്നുണ്ടോ?

ഉണ്ട് , മാനസികസമ്മർദ്ദവും ബിപി ഉയർത്തുന്നതുമായി നേരിട്ട് ബന്ധമുണ്ട്; നീണ്ടുനിൽക്കുന്ന സമ്മർദ്ദം ശരീരത്തിൽ അഡ്രിനാലിൻ, കോർട്ടിസോൾ പോലുള്ള ഹോർമോണുകൾ വർധിപ്പിച്ച് രക്തസമ്മർദ്ദം കൂട്ടാം.

ആധുനിക കാലഘട്ടത്തിലെ ജീവിതശൈലീ രോഗങ്ങളുടെ പ്രധാന കാരണങ്ങളിലൊന്നായി ഇതിനെ കാണുന്നു.

1. മാനസികസമ്മർദ്ദം (Stress)

പഠനഭാരമോ മറ്റ് കാരണങ്ങളാലോ ഉണ്ടാകുന്ന കടുത്ത മാനസികസമ്മർദ്ദം ശരീരത്തിൽ കോർട്ടിസോൾ (Cortisol), അഡ്രിനാലിൻ (Adrenaline) തുടങ്ങിയ ഹോർമോണുകളുടെ അളവ് വർദ്ധിപ്പിക്കുന്നു. ഇത് ഹൃദയമിടിപ്പ് കൂട്ടുകയും രക്തധമനികളെ സങ്കോചിപ്പിക്കുകയും ചെയ്യുന്നു. തൽഫലമായി രക്തസമ്മർദ്ദം താൽക്കാലികമായി ഉയരുന്നു. സമ്മർദ്ദം വിട്ടുമാറാതെ തുടരുന്നത് (Chronic Stress) ദീർഘകാലാടിസ്ഥാനത്തിൽ ഉയർന്ന രക്തസമ്മർദ്ദത്തിലേക്ക് (Hypertension) നയിക്കാം.

2. ഉറക്കക്കുറവ് (Lack of Sleep)

ശരീരത്തിന്റെ സ്വാഭാവികമായ വിശ്രമവേളയാണ് ഉറക്കം. ഉറക്കത്തിൽ നമ്മുടെ രക്തസമ്മർദ്ദം സാധാരണ നിലയേക്കാൾ കുറയാറുണ്ട് (Dipping). എന്നാൽ കൃത്യമായി ഉറക്കം ലഭിക്കാത്തവരിലും ഉറക്കം മുറിയുന്നവരിലും ഈ പ്രക്രിയ തടസ്സപ്പെടുന്നു.

3. ഡിജിറ്റൽ സ്ക്രീൻ സമയം (Digital Screen Time)

മൊബൈൽ, ടിവി എന്നിവയുടെ അമിത ഉപയോഗം നേരിട്ടല്ലെങ്കിലും പരോക്ഷമായി രക്തസമ്മർദ്ദത്തെ ബാധിക്കുന്നു:

• ഉറക്കത്തെ ബാധിക്കുന്നു: സ്ക്രീനുകളിൽ നിന്നുള്ള നീല വെളിച്ചം (Blue Light) ഉറക്കത്തിന് സഹായിക്കുന്ന മെലാടോണിൻ (Melatonin) എന്ന ഹോർമോണിന്റെ ഉത്പാദനത്തെ തടയുന്നു.

• ശാരീരിക വ്യായാമമില്ലായ്മ: കൂടുതൽ സമയം സ്ക്രീനിന് മുന്നിലിരിക്കുന്നത് ശാരീരിക അധ്വാനം കുറയ്ക്കുകയും പൊണ്ണത്തടിക്ക് (Obesity) കാരണമാവുകയും ചെയ്യുന്നു. ഇത് രക്തസമ്മർദ്ദം കൂട്ടുന്ന ഘടകമാണ്.

• ഡിജിറ്റൽ ഐ സ്ട്രെയിൻ: സ്ക്രീനുകളിലെ വിവരങ്ങൾ അമിതമായി തലച്ചോറിലെത്തുന്നത് നാഡീസംബന്ധമായ സമ്മർദ്ദത്തിന് കാരണമാകുന്നു.

Read More: ഡിജിറ്റൽ യുഗത്തിൽ കാഴ്ച സംരക്ഷിക്കാം, സ്ക്രീൻ ഉപയോഗം കണ്ണുകളെ ബാധിക്കുന്നുണ്ടോ? അറിയാം

8.വിട്ടുമാറാത്ത തലവേദന, കാഴ്ച മങ്ങൽ, അല്ലെങ്കിൽ അമിതമായ ക്ഷീണം തുടങ്ങിയ ലക്ഷണങ്ങളെ രക്തസമ്മർദ്ദത്തിന്റെ മുന്നറിയിപ്പുകളായി കാണേണ്ടതുണ്ടോ?

 തീർച്ചയായും. വിട്ടുമാറാത്ത തലവേദന, കാഴ്ച മങ്ങൽ, അമിതമായ ക്ഷീണം എന്നിവ ഉയർന്ന രക്തസമ്മർദ്ദത്തിന്റെ  പ്രധാന ലക്ഷണങ്ങളാകാൻ സാധ്യതയുണ്ട്. പലപ്പോഴും രക്തസമ്മർദ്ദം ഒരു 'നിശബ്ദ കൊലയാളി' (Silent Killer) എന്നാണ് അറിയപ്പെടുന്നത്, കാരണം പലരിലും പ്രകടമായ ലക്ഷണങ്ങൾ ഇല്ലാതെ തന്നെ ഇത് ആരോഗ്യത്തെ ബാധിക്കാം.

ഇക്കാര്യത്തിൽ ശ്രദ്ധിക്കേണ്ട ചില പ്രധാന കാര്യങ്ങൾ താഴെ നൽകുന്നു:

1. തലവേദന (Headache)

സാധാരണ തലവേദനകളിൽ നിന്ന് വ്യത്യസ്തമായി, രക്തസമ്മർദ്ദം കൂടുമ്പോൾ തലയുടെ പിൻഭാഗത്തോ മുകൾ ഭാഗത്തോ കഠിനമായ സമ്മർദ്ദം അനുഭവപ്പെടാം. രക്തസമ്മർദ്ദം അപകടകരമാംവിധം ഉയരുമ്പോഴാണ് (Hypertensive Crisis) സാധാരണയായി ഇത്തരം തലവേദന വരുന്നത്.

2. കാഴ്ച മങ്ങൽ (Blurred Vision)

രക്തസമ്മർദ്ദം കൂടുമ്പോൾ കണ്ണുകളിലെ നേർത്ത രക്തക്കുഴലുകൾക്ക് തകരാർ സംഭവിക്കാം. ഇതിനെ 'ഹൈപ്പർടെൻസീവ് റെറ്റിനോപ്പതി' എന്ന് വിളിക്കുന്നു. കാഴ്ച പെട്ടെന്ന് മങ്ങുന്നതോ തടസ്സപ്പെടുന്നതോ ആയ അവസ്ഥ ഗൗരവമായി കാണണം.

3. അമിതമായ ക്ഷീണം (Fatigue)

കൂടിയ രക്തസമ്മർദ്ദം ശരീരത്തിലെ ഹൃദയത്തെയും വൃക്കകളെയും അമിതമായി ജോലി ചെയ്യാൻ പ്രേരിപ്പിക്കുന്നു. ഇത് ശരീരത്തിന് തളർച്ചയും ഊർജ്ജമില്ലായ്മയും അനുഭവപ്പെടാൻ കാരണമാകും.

മറ്റ് അനുബന്ധ ലക്ഷണങ്ങൾ:

• നെഞ്ചുവേദന അല്ലെങ്കിൽ ഹൃദയമിടിപ്പ് കൂടുക.

• ശ്വാസതടസ്സം അനുഭവപ്പെടുക.

• തലകറക്കം.

• മൂക്കിൽ നിന്നുള്ള രക്തസ്രാവം.

 രക്തസമ്മർദ്ദം നിയന്ത്രിക്കുന്നതിനായി കുട്ടികൾ ദിവസവും ചെയ്യേണ്ട വ്യായാമങ്ങൾ എന്തൊക്കെയാണ്? കായിക വിനോദങ്ങളിൽ ഏർപ്പെടുമ്പോൾ പ്രത്യേകം ശ്രദ്ധിക്കേണ്ട കാര്യങ്ങളുണ്ടോ?

കുട്ടികളിലെ രക്തസമ്മർദ്ദം നിയന്ത്രിക്കുന്നതിന് ചിട്ടയായ ശാരീരിക അധ്വാനം വളരെ പ്രധാനമാണ്. വെറും വ്യായാമം എന്നതിലുപരി വിനോദരൂപേണയുള്ള പ്രവർത്തനങ്ങളാണ് കുട്ടികൾക്ക് കൂടുതൽ അനുയോജ്യം. കായികവിനോദങ്ങളിൽ പങ്കെടുക്കുമ്പോൾ പ്രായത്തിന് അനുയോജ്യമായ പരിശീലനം, ആവശ്യത്തിന് വെള്ളം കുടിക്കൽ,കാലാവസ്ഥാ മാറ്റങ്ങളില്‍ നിന്നുള്ള സംരക്ഷണം എന്നിവ പ്രത്യേകം ശ്രദ്ധിക്കണം.

കുട്ടികൾ ദിവസവും കുറഞ്ഞത് 60 മിനിറ്റ് എങ്കിലും മിതമായതോ തീവ്രമായതോ ആയ ശാരീരിക അധ്വാനത്തിൽ ഏർപ്പെടണം.

എയറോബിക് വ്യായാമങ്ങൾ: നടത്തം, ഓട്ടം, സൈക്ലിംഗ്, നീന്തൽ എന്നിവ ഹൃദയാരോഗ്യത്തിന് മികച്ചതാണ്. ഇവ രക്തചംക്രമണം സുഗമമാക്കാൻ സഹായിക്കുന്നു.

കായിക വിനോദങ്ങൾ: ഫുട്ബോൾ, ബാഡ്മിന്റൺ, ബാസ്ക്കറ്റ്ബോൾ തുടങ്ങിയ കളികൾ കുട്ടികളിലെ അമിതഭാരം കുറയ്ക്കാനും രക്തസമ്മർദ്ദം നിയന്ത്രിക്കാനും സഹായിക്കും.

ആക്റ്റീവ് പ്ലേ: ഒളിച്ചുകളി, ചാട്ടം (Jumping rope), നൃത്തം തുടങ്ങിയവ വ്യായാമമാണെന്ന തോന്നലില്ലാതെ തന്നെ കുട്ടികൾക്ക് ആസ്വദിച്ച് ചെയ്യാവുന്നതാണ്.

പേശികളെ ബലപ്പെടുത്തുന്നവ: ആഴ്ചയിൽ മൂന്ന് ദിവസമെങ്കിലും മരങ്ങളിൽ കയറുന്നതോ, പുഷ്-അപ്‌സ് (Push-ups) പോലുള്ള ലളിതമായ വ്യായാമങ്ങളോ ചെയ്യുന്നത് നല്ലതാണ്.

കായികവിനോദങ്ങളിൽ ശ്രദ്ധിക്കേണ്ടത്

• പുതിയ വ്യായാമം അല്ലെങ്കിൽ സ്പോർട്‌സ്  പതുക്കെ തുടങ്ങുക.
• ചൂടുള്ള കാലാവസ്ഥയിൽ വെള്ളം ഇടയ്ക്കിടെ കുടിക്കുക, വിശ്രമം എടുക്കുക, തല മറയ്ക്കുന്ന വസ്ത്രം/തൊപ്പി ഉപയോഗിക്കുക, സൺസ്‌ക്രീൻ പരിഗണിക്കുക.
• ബാസ്കറ്റ്‌ബോൾ, സൈക്ലിംഗ്, സ്കേറ്റ്‌ബോർഡിംഗ്, കോൺടാക്റ്റ് സ്പോർട്‌സ് എന്നിവയിൽ ഹെൽമറ്റ്, ഗാർഡ് തുടങ്ങിയ സംരക്ഷണ ഉപകരണങ്ങൾ ഉപയോഗിക്കുക.
• ശരീരം ചൂടാക്കുക (Warm-up): കളി തുടങ്ങുന്നതിന് മുൻപ് അഞ്ചു മിനിറ്റ് ശരീരം ഒന്ന് ചൂടാക്കുന്നതും (Warm-up), കളി കഴിഞ്ഞാൽ പതുക്കെ വിശ്രമത്തിലേക്ക് വരുന്നതും (Cool-down) ഹൃദയമിടിപ്പ് പെട്ടെന്ന് ഉയരുന്നത് ഒഴിവാക്കാൻ സഹായിക്കും.
• തലകറക്കം, നെഞ്ചുവേദന, അസാധാരണ ശ്വാസംമുട്ടൽ, ബോധക്ഷയം, പേശിവേദനയോടെ അമിതചൂട് എന്നിവ വന്നാൽ ഉടൻ കളി നിർത്തി വൈദ്യസഹായം തേടുക.

കുട്ടിക്കാലത്തെ ഉയർന്ന രക്തസമ്മർദ്ദം ചികിത്സിക്കാതിരുന്നാൽ അത് അവരുടെ മുതിർന്ന പ്രായത്തിലുള്ള ആരോഗ്യത്തെയും ജീവിതദൈർഘ്യത്തെയും എങ്ങനെയെല്ലാം ബാധിക്കും?

കുട്ടിക്കാലത്തെ ഉയർന്ന രക്തസമ്മർദ്ദം പലപ്പോഴും ശ്രദ്ധിക്കപ്പെടാതെ പോകുന്ന ഒന്നാണ്. ഇത് കൃത്യസമയത്ത് ചികിത്സിക്കാതിരുന്നാൽ മുതിർന്ന പ്രായത്തിൽ ഗുരുതരമായ ആരോഗ്യപ്രശ്നങ്ങളിലേക്ക് നയിക്കും. ഉയർന്ന രക്തസമ്മർദ്ദം ചികിത്സിക്കാതെ വിട്ടാൽ അത് ഹൃദയം, രക്തക്കുഴലുകൾ, വൃക്കകൾ, തലച്ചോർ , കണ്ണുകൾ തുടങ്ങിയവയ്ക്ക് എന്നിവയ്ക്ക് ദീർഘകാല കേടുണ്ടാക്കുകയും ചെയ്യും. ഇതോടെ മുതിർന്ന പ്രായത്തിൽ ഹൃദ്രോഗം, പക്ഷാഘാതം, വൃക്കരോഗം, നേരത്തെ വരുന്ന ഹൃദയാഘാതം എന്നിവയുടെ സാധ്യത ഉയരും

1. ഹൃദയാരോഗ്യത്തെ ബാധിക്കുന്നു

കുട്ടിക്കാലം മുതൽ രക്തസമ്മർദ്ദം ഉയർന്ന നിലയിലാണെങ്കിൽ, ഹൃദയത്തിന് രക്തം പമ്പ് ചെയ്യാൻ കൂടുതൽ കഠിനാധ്വാനം ചെയ്യേണ്ടി വരുന്നു. ഇത് Left Ventricular Hypertrophy (LVH) എന്ന അവസ്ഥയ്ക്ക് കാരണമാകും (ഹൃദയത്തിന്റെ പേശികൾ കട്ടി കൂടുന്ന അവസ്ഥ). ഇത് മുതിർന്ന പ്രായത്തിൽ ഹൃദയസ്തംഭനം (Heart Failure), ഹൃദയാഘാതം (Heart Attack) എന്നിവയ്ക്കുള്ള സാധ്യത വർദ്ധിപ്പിക്കുന്നു. 40% കുട്ടികളിൽ ലക്ഷണങ്ങൾ പ്രകടമാകുന്നതിന് മുമ്പേ ഈ മാറ്റങ്ങൾ ആരംഭിക്കുന്നു, കൂടാതെ 12-15 വയസ്സിൽ തുടങ്ങിയ ഉയർന്ന രക്തസമ്മർദ്ദം 30-കളിൽ ഗുരുതരമാകാം.

2. ധമനികൾക്ക് സംഭവിക്കുന്ന തകരാറുകൾ

തുടർച്ചയായ ഉയർന്ന രക്തസമ്മർദ്ദം രക്തധമനികളുടെ ഇലാസ്തികത കുറയ്ക്കുകയും അവ കഠിനമാവുകയും ചെയ്യുന്നു (Atherosclerosis). ഇത് രക്തയോട്ടത്തെ തടസ്സപ്പെടുത്തുകയും ചെറുപ്പത്തിൽ തന്നെ പക്ഷാഘാതം (Stroke) വരാനുള്ള സാധ്യത കൂട്ടുകയും ചെയ്യുന്നു.

3. വൃക്കകളുടെ പ്രവർത്തനം തകരാറിലാകുന്നു

വൃക്കയിലെ സൂക്ഷ്മമായ രക്തക്കുഴലുകളെ ഉയർന്ന രക്തസമ്മർദ്ദം നശിപ്പിക്കും. ഇത് കാലക്രമേണ വിട്ടുമാറാത്ത വൃക്കരോഗങ്ങളിലേക്കോ (Chronic Kidney Disease) വൃക്ക തകരാഖിലേക്കോ (Kidney Failure) നയിക്കാം.

4. ജീവിതദൈർഘ്യം കുറയുന്നു

ചെറുപ്പത്തിലേ തുടങ്ങുന്ന രക്തസമ്മർദ്ദം ചികിത്സിച്ചില്ലെങ്കിൽ ശരീരത്തിലെ ആന്തരിക അവയവങ്ങൾക്ക് നേരത്തെ തന്നെ തേയ്മാനം സംഭവിക്കുന്നു. ഇത് സ്വാഭാവികമായും ആയുർദൈർഘ്യം കുറയ്ക്കാൻ കാരണമാകുന്നു. ആരോഗ്യകരമായ ഭക്ഷണരീതിയും വ്യായാമവും ഇല്ലാത്ത പക്ഷം മറ്റ് രോഗങ്ങളായ പ്രമേഹം, അമിതവണ്ണം എന്നിവയും ഇതിനോടൊപ്പം ചേർന്ന് സ്ഥിതി സങ്കീർണ്ണമാക്കും.

കുട്ടികളിലെ അമിത രക്തസമ്മർദ്ദം കൃത്യസമയത്ത് ചികിത്സിച്ചില്ലെങ്കിൽ, അത് അവരുടെ മസ്തിഷ്ക വികാസത്തെ ബാധിക്കുമെന്ന് പുതിയ പഠനങ്ങൾ വ്യക്തമാക്കുന്നു. ഇതവരുടെ കാര്യനിർവ്വഹണ ശേഷി (Executive Function),ശ്രദ്ധ (Attention),ഓർമ്മശക്തി (Memory) തുടങ്ങിയവയില്‍ കുറവുണ്ടാക്കാൻ കാരണമായേക്കാം