ഉറക്കത്തിലെ ശ്വാസതടസ്സവും അമിത ക്ഷീണവും; കൂർക്കംവലിയും സ്ലീപ് അപ്നിയയും തിരിച്ചറിയാം

പലപ്പോഴും ആളുകൾ തമാശയായി തള്ളിക്കളയുന്ന കൂർക്കംവലി ചിലപ്പോൾ ഗുരുതരമായ ആരോഗ്യപ്രശ്നങ്ങളുടെ ലക്ഷണമാകാം. സാധാരണ കണക്കനുസരിച്ച് 45% ഓളം ആളുകൾ ക്ഷീണം കാരണം എപ്പോഴെങ്കിലും കൂർക്കം വലിക്കാറുണ്ട്. എന്നാൽ ഇതൊരു സ്ഥിരമായ ശീലമായി  മാറുമ്പോഴാണ് നമ്മൾ ശ്രദ്ധിക്കേണ്ടത്. കോഴിക്കോട് ബേബി മെമ്മോറിയൽ ഹോസ്പിറ്റലിലെ പൾമനോളജിസ്റ്റ് ഡോക്ടർ നന്ദിനി വി കൂർക്കംവലിയും അതുമായി ബന്ധപ്പെട്ടുണ്ടാകുന്ന സ്ലീപ് അപ്നിയ എന്ന രോഗാവസ്ഥയെയും കുറിച്ച് വിശദീകരിക്കുന്നു.

അമിതവണ്ണമുള്ളവരിലും ഹൃദ്രോഗം, കിഡ്നി പ്രശ്നങ്ങൾ, ലിവർ തകരാറുകൾ തുടങ്ങിയ ക്രോണിക് അസുഖങ്ങൾ ഉള്ളവരിലും അലർജി, തൈറോയ്ഡ് എന്നിവ ഉള്ളവരിലും ഈ അവസ്ഥ പ്രശ്നക്കാരനായി മാറാം. ഇത് സ്ലീപ് അപ്നിയ എന്ന രോഗാവസ്ഥയിലേക്ക് മാറുന്നുണ്ടോ എന്ന് തിരിച്ചറിയാൻ രാത്രികാലങ്ങളിലെയും പകൽ സമയങ്ങളിലെയും ലക്ഷണങ്ങൾ ശ്രദ്ധിക്കേണ്ടതുണ്ട്.

ശബ്ദത്തോടെയുള്ള കൂർക്കംവലി: ഇത് കൂടെ കിടക്കുന്നവരുടെ (Bed partners) ഉറക്കം നഷ്ടപ്പെടുത്തുന്നു.

ശ്വാസതടസ്സം: ഉറക്കത്തിൽ ഏകദേശം 8 മുതൽ 10 സെക്കൻഡോളം ശ്വാസം ഉള്ളിലേക്കും പുറത്തേക്കും പോകാതെ തടസ്സപ്പെടുക.

ഇടയ്ക്കിടയ്ക്ക് മൂത്രമൊഴിക്കാൻ തോന്നുക: ശ്വാസതടസ്സം കാരണം ശരീരത്തിൽ ഓക്സിജന്റെ അളവ് കുറയുകയും പൾസ് റേറ്റിൽ വ്യത്യാസം വരികയും ചെയ്യുന്നു. ഇത് ഉറക്കത്തെ തടസ്സപ്പെടുത്തുന്നതിനാൽ (Disturbed Sleep), ആഴത്തിലുള്ള ഉറക്കത്തിൽ നിന്ന് ഞെട്ടി ലൈറ്റർ സ്ലീപ്പിലേക്ക് മാറുകയും രാത്രി പലതവണ ബാത്റൂമിൽ പോകേണ്ടി വരികയും ചെയ്യുന്നു.

ഉറക്കത്തിലെ ഞെട്ടൽ: ആരോ ശ്വാസം മുട്ടിക്കുന്നത് പോലെയുള്ള സ്വപ്നങ്ങൾ കണ്ട് പാനിക് അറ്റാക്ക് പോലെ ഞെട്ടി ഉണരുക.

അപസ്മാരം: വളരെ ചുരുക്കം ആളുകളിൽ രാത്രികാലങ്ങളിൽ മാത്രം അപസ്മാരത്തിന്റെ പ്രശ്നങ്ങൾ കാണാം.

അമിതമായ ക്ഷീണം: രാത്രി ഉറക്കം തടസ്സപ്പെടുന്നതിനാൽ രാവിലെ എഴുന്നേൽക്കുമ്പോൾ കടുത്ത ക്ഷീണം അനുഭവപ്പെടുന്നു. പകൽ മുഴുവൻ അകാരണമായ ക്ഷീണവും ഒന്നിനോടും താല്പര്യമില്ലായ്മയും ഉണ്ടാകാം.

ഉറക്കംതൂങ്ങൽ: മീറ്റിംഗുകളിലോ മറ്റ് ആക്റ്റീവ് ആയ കാര്യങ്ങളിലോ ഏർപ്പെടുമ്പോൾ ഇരുന്നിരുപ്പിൽ ഉറക്കംതൂങ്ങിപ്പോവുക. പ്രായമായവരിൽ ഇത് പലപ്പോഴും ശ്രദ്ധിക്കപ്പെടാതെ പോകുന്ന ഒരു ലക്ഷണമാണ്.

സ്ലീപ് അപ്നിയ കൃത്യമായി ചികിത്സിച്ചില്ലെങ്കിൽ അത് ലോങ്ങ് ടേമിൽ മറ്റ് പല ഗുരുതര രോഗങ്ങൾക്കും കാരണമാകാം.

ഡയബറ്റിസ്, ഹൈപ്പർടെൻഷൻ: ഇവരിൽ പ്രമേഹവും ബിപിയും സാധാരണയായി കാണുന്നു. ബിപി നിയന്ത്രിക്കാൻ രണ്ടോ അതിലധികമോ മരുന്നുകൾ കഴിക്കേണ്ടി വരുന്ന സാഹചര്യമുണ്ടെങ്കിൽ കൂർക്കംവലി പരിശോധിക്കേണ്ടതുണ്ട്.

ഹൃദ്രോഗ സാധ്യതകൾ: ഹാർട്ട് ഫെയിലിയർ, ഹാർട്ട് അറ്റാക്ക്, സ്ട്രോക്ക് (Stroke) എന്നിവ വരാനുള്ള പ്രധാന റിസ്ക് ഫാക്ടർ സ്ലീപ് അപ്നിയയാണ്.

മറ്റ് പ്രശ്നങ്ങൾ: ഓർമ്മക്കുറവ് (Dementia), വെച്ച സാധനങ്ങൾ മറന്നുപോവുക, ലൈംഗിക താല്പര്യമില്ലായ്മ (Sexual dysfunction/Impotence) എന്നിവയും ഇതിന്റെ ഭാഗമായി ഉണ്ടാകാം.

ഈ ലക്ഷണങ്ങൾ കണ്ടാൽ സ്ലീപ് സ്റ്റഡി (Sleep Study) നടത്തേണ്ടത് അത്യാവശ്യമാണ്. ഇത് സാധാരണയായി ആശുപത്രിയിൽ വെച്ചാണ് ചെയ്യുന്നത്. ചില കേസുകളിൽ ഹോം സ്റ്റഡി ചെയ്യാമെങ്കിലും ഇൻ-ഹോസ്പിറ്റൽ ടെസ്റ്റ് ആണ് കൂടുതൽ വിശ്വാസ്യം. ഉറക്കത്തിൽ എത്ര തവണ ശ്വാസതടസ്സം ഉണ്ടാകുന്നു, ഓക്സിജൻ ലെവൽ എത്രത്തോളം കുറയുന്നു, ഹാർട്ട് ബീറ്റ്, ഇഇജി (EEG) എന്നിവയാണ് ഇതിലൂടെ പരിശോധിക്കുന്നത്.

സ്ലീപ് അപ്നിയ ചികിത്സയിൽ ഏറ്റവും പ്രധാനം ജീവിതശൈലി പരിഷ്കരണമാണ് (Life style modification).

ശരീരഭാരം കുറയ്ക്കൽ: ശരീരഭാരത്തിൽ ഏകദേശം 10% കുറവ് വരുത്തിയാൽ മാത്രമേ സ്ലീപ് അപ്നിയയിൽ കാര്യമായ പുരോഗതി ഉണ്ടാകൂ. ദിവസേനയുള്ള എക്സർസൈസ് ഇതിനായി ശീലമാക്കണം.

ലഹരിവർജ്ജനം: ആൽക്കഹോൾ ഉപയോഗം മസിലുകളെ റിലാക്സ് ചെയ്യിക്കുകയും കൂർക്കംവലി കൂട്ടുകയും ചെയ്യും. അതിനാൽ ആൽക്കഹോൾ, സ്മോക്കിങ് (Smoking) എന്നിവ പൂർണ്ണമായും നിർത്തണം.

മറ്റ് അസുഖങ്ങളുടെ ചികിത്സ: അസിഡിറ്റി ഉള്ളവർ അത് ചികിത്സിക്കുക. തൈറോയ്ഡ്, നേസൽ അലർജി എന്നിവയുള്ളവർ അതിനുള്ള കൃത്യമായ ചികിത്സ തേടുക.

സിപാപ് (CPAP) ട്രീറ്റ്മെന്റ്: ശ്വാസതടസ്സത്തിന്റെ തോതനുസരിച്ച് പലർക്കും സിപാപ് ചികിത്സ ആവശ്യമായി വരും. അടഞ്ഞിരിക്കുന്ന ശ്വാസനാളികളെ ഒരു പ്രഷർ നൽകി ഓപ്പൺ ചെയ്തു വെക്കുന്ന രീതിയാണിത്. നെബുലൈസേഷൻ മെഷീൻ പോലെയുള്ള ചെറിയ മെഷീനും ഒരു മാസ്കും ഉപയോഗിച്ചാണ് ഇത് ചെയ്യുന്നത്.

ചിട്ടയായ ജീവിതശൈലിയും ശരീരഭാരത്തിൽ നിയന്ത്രണവും കൃത്യമായ ചികിത്സയും ഉണ്ടെങ്കിൽ സ്ലീപ് അപ്നിയയെ പൂർണ്ണമായി വരുതിയിലാക്കാനും അതുവഴി ഉണ്ടാകുന്ന ഹൃദ്രോഗം, പ്രമേഹം, ബിപി തുടങ്ങിയ പ്രശ്നങ്ങളെ പ്രതിരോധിക്കാനും സാധിക്കും.